Kumusta, Tanglaw fam? Welcome sa huling bahagi ng ating series na “Salvation: Your Top Questions Answered.” Ngayong araw, sasagutin natin ang isang napakahalagang tanong: “Ang kaligtasan ba ay sa pananampalataya lang o may kasama pang gawa?” Alamin natin ang malinaw na sagot mula sa Salita ng Diyos.

Sapagkat dahil sa kagandahang-loob ng Diyos kayo ay naligtas sa pamamagitan ng pananampalataya; at ang kaligtasang ito’y kaloob ng Diyos at hindi sa pamamagitan ng inyong sarili; hindi ito bunga ng inyong mga gawa kaya’t walang dapat ipagmalaki ang sinuman.

Mga Taga-Efeso 2:8–9

Madalas, isa sa mga pinakamalaking tanong na bumabagabag sa isip ng marami ay ito: “Paano ba talaga ako maliligtas? Sapat na ba ang maniwala lang, o kailangan ko pa bang gumawa ng maraming kabutihan para maging karapat-dapat sa Diyos?” Maraming tao ang lumalaki sa ideya na ang kaligtasan ay parang isang timbangan — kung mas marami ang mabuting gawa mo kaysa sa masama, doon ka maliligtas. Pero totoo ba ito?

Ang Salita ng Diyos ay napakalinaw tungkol dito. Sabi sa Mga Taga-Efeso 2:8–9, “Sapagkat sa biyaya kayo naligtas sa pamamagitan ng pananampalataya; at ito’y hindi mula sa inyong sarili, kaloob ito ng Diyos; hindi sa pamamagitan ng mga gawa, upang walang sinuman ang makapagmalaki.” Ito ang puso ng gospel. Ang kaligtasan ay isang biyaya o grace ng Diyos, na tinatanggap sa pamamagitan ng pananampalataya o faith. Hindi ito isang bagay na pinaghihirapan, binibili, o kinikita sa pamamagitan ng ating mga gawa. Kung kaya nating iligtas ang sarili natin, hindi na sana kailangan pang mamatay ni Jesus sa cross. 

Ang problema sa pag-iisip na “faith plus works” ang magliligtas sa atin ay ito: Sino ang magtatakda kung gaano karami ang sapat? Hindi natin kailanman kayang maabot ang perpektong standard ng Diyos sa ating sariling lakas. Ang ating mga mabubuting gawa ay hindi ang ugat ng ating kaligtasan, kundi ang bunga nito. Kapag tinanggap natin si Jesus sa pamamagitan ng pananampalataya, ang Kanyang Espiritu Santo, ang Holy Spirit, ang magtutulak sa atin na gumawa ng mabuti, hindi para maligtas, kundi dahil naligtas na tayo. Ito ang kapangyarihan ng gospel na bumabago sa atin mula sa loob.

Sana’y naging malinaw sa atin ngayon ang katotohanan tungkol sa kaligtasan sa pamamagitan ng pananampalataya. Patuloy tayong mag-reflect at maghanap ng katotohanan. Maraming salamat sa pagsama sa atin sa “Salvation: Your Top Questions Answered” series!