26

JANUARY, 2021

1 Mga Cronica 4:10

Anong mararamdaman mo kung ang pangalan na ibinigay sa iyo ng magulang mo ay isang pangalang masama ang ibig sabihin? Ganito ang nangyari kay Jabez. Noong siya ay ipinanganak, labis na nahirapan ang nanay ni Jabez sa panganganak sa kanya kaya naman ang ibinigay na pangalan sa kanya ay Jabez na ang ibig sabihin ay “Masyado akong nahirapan nang ipanganak ko siya.”

Ang saklap, hindi ba? Sariling magulang mo pa ang nagbigay sa iyo ng isang pangalang hindi kanais-nais. Marahil ay naging tampulan ng tukso si Jabez dahil sa kanyang kakaibang pangalan. May mga tao rin siguro na nagsasabi na “malas” si Jabez dahil sa malas ang kanyang pangalan.

Pero ganoon pa man, hindi naniwala si Jabez na “malas” siya. Sa halip, nanalangin siya sa Panginoon at humingi siya ng apat na bagay na magpapatunay na kahit ganoon ang kanyang pangalan, hindi ito magiging dahilan para hindi siya pagpalain ni Lord. Ano-ano ba ang mga hiniling ni Jabez kay Lord?

Una: Pagpalain po ninyo ako! (provision)
Pangalawa: Palawakin ninyo ang aking lupain (promotion)
Pangatlo: Samahan po ninyo ako (presence/power)
Pang-apat: Ingatan sa anumang kasawiang makakasakit sa akin (protection)

At ano ang sagot ni Lord sa panalangin niya? Ipinagkaloob ng Diyos ang kanyang kahilingan (1 Cronica 4:10). Naniwala si Jabez na hindi ang kanyang pangalan ang magdidikta ng kanyang buhay kundi ang pananampalataya niya sa Diyos na kaya Niya siyang pagpalain, ingatan, at pasaganain. At kung ginawa iyon ni Lord para kay Jabez, magagawa Niya rin iyon para sa iyo, regardless kung ano ang tingin at sinasabi ng ibang tao tungkol sa iyo.

Share this encouraging page to family and friends.