Huwag din ninyong aapihin ang mga balo at ang mga ulila. Kapag inapi ninyo sila at dumaing sa akin, tiyak na papakinggan ko sila.

Exodo 22:22-23

Marahil hindi naman natin inaapi ang mga balo at ang mga ulila. Hindi natin sila sinasaktan o inaagrabyado. Pero kailan natin sila huling naisip o napansin? Alam natin na mahirap ang kalagayan ng young single mothers at ng kanilang mga anak. Para naman sa mga balo at ulila, hindi pa rin nila maiiwasan ang malungkot tuwing may mga okasyon gaya ng Father’s Day, Mother’s Day, at wedding anniversary. Napaka-importante ng emotional support system para sa mga balo at ulila, kahit anong edad ng mga ito.

Meron ding maituturing na “orphans” dahil sila lang sa kanilang pamilya ang tumanggap kay Jesus bilang Tagapagligtas. Nag-iisa silang mananampalataya sa pamilya. Minsan, persecuted sila ng kanilang magulang at mga kapatid dahil sa kanilang faith. Mabuti na lang at mayroon tayong spiritual family na matatagpuan sa church.

Kung ikaw ay ulila o balo, tandaan mo na mahal na mahal ka ng Panginoon. Sabi nga ng Mga Awit 68:5, “Ang Diyos na naroroon sa tahanan niyang templo, tumitingin sa ulila’t sanggalang ng mga balo.” Hindi ka nag-iisa at hindi ka Niya iiwanan! Bahagi ng utos ng Diyos sa mga Israelita noon ang huwag apihin ang mga balo at mga ulila. At maging si Apostol Pablo ay nagbilin kay Timothy na “tulungan ang mga biyuda na walang ikabubuhay” (1 Timoteo 5:3). Kaya bilang pagmamahal sa Panginoon, mahalin din natin ang mga balo at ulila.

Share this encouraging page to family and friends.