Kaya’t ang bawat nakikinig at nagsasagawa ng mga salita kong ito ay maitutulad sa isang taong matalino na nagtayo ng kanyang bahay na ang pundasyon ay bato.

Mateo 7:24

Matapos ang matagal na paghingi ni Josiah sa kanyang mga magulang na magkaroon ng kubo sa kanilang bakuran para maging tambayan, finally, naipatayo na ito. Sa sobrang excited niya, ilang araw siyang natutulog dito. Ngunit isang araw, dumating ang bagyo. Kinailangan ni Josiah na bumalik sa bahay nilang yari sa bato para hindi siya mabasa sa loob ng kubo. Isang buong araw na umulan nang malakas at tuloy-tuloy ang hagupit ng hangin sa kanilang lugar.

Kinabukasan, nakita na lamang ni Josiah na wasak ang kubo na ilang araw pa lamang naipatayo. Agad na nawasak ang kubo dahil bukod sa hindi matibay ang materyales na ginamit sa pagbuo nito, hindi rin malalim ang naging pundasyon nito. Habang tinitingnan ni Josiah ang kanilang bahay na bato, naisip niya na tatlong dekada na itong nakatayo, pero dahil matibay ang pundasyon nito, hindi ito natinag sa bagyo.

Sabi sa Mateo 7:24, ang pagsunod sa Salita ni God ay parang pagtatayo ng bahay na ang pundasyon ay bato. Ibig sabihin, matibay ito. Hindi ito matitibag anumang panahon ang dumaan. Dumaan man ang matinding init o pressure sa buhay mo, kung papakinggan mo at susundin ang Salita ng Diyos, makakaranas ka pa rin ng comfort. Hampasin ka man ng bagyo ng depression, sickness, or even death, hindi ka matatangay.  Ang Salita ng Diyos ang magpapatibay sa iyo para di ka mabuwag anuman ang panahon.