“At papahirin niya ang bawat luha sa kanilang mga mata. Wala nang kamatayan, dalamhati, pagtangis, at paghihirap sapagkat lumipas na ang dating mga bagay.”

Pahayag 21:4

Ang bawat pelikula ay may simula, gitna, at katapusan. Sa simula, nakikilala ang mga tauhan sa kuwento—bida, kontrabida, o maging mga bit player. Nalalaman ang kanilang pinanggalingan, katangian, at pati hugot sa buhay. Habang sa gitna naman ay nakikita ang mga struggle, conflict, at maging ang wins and losses ng bawat tauhan. Pero hindi lahat ng kuwento ay pare-pareho ang katapusan. May masaya, malungkot, at open-ended o bitin.

Ang buhay natin ay maihahalintulad sa isang pelikula. Isang mahalagang kuwento mula sa Panginoon. May romance, comedy, drama, suspense, at kung minsan, malungkot. Tayo ang mga tauhang gumaganap sa plot ng kuwento. Alam ng Diyos ang lahat ng mangyayari sa ating buhay at may pahintulot Niya. Bawat saya, lungkot, tuwa, luha, pagkabigo, at pagkapanalo natin ay nalalaman ng Panginoon. He’s got you covered.

Kaya makakaasa tayo na sa kabila ng pagkamatay ng pangarap, pagtangis sa pagkabigo, pagdadalamhati sa pagpanaw ng minamahal o paghihirap sa buhay, kasama natin ang Panginoon. Dahil ang pangako Niyang ending ay talaga namang kaabang-abang, “papahirin niya ang bawat luha sa kanilang mga mata. Wala nang kamatayan, dalamhati, pagtangis, at paghihirap sapagkat lumipas na ang dating mga bagay.”

Share this encouraging page to family and friends.