Inyong alalahanin ang mga kamangha-mangha niyang gawa, ang matuwid na paghatol at gawang kahanga-hanga.

1 Mga Cronica 16:12

Eto na naman tayo, mga kababayan! Ilang oras na lang, countdown na naman. Sari-saring tradisyon at pamahiin ang nagaganap. May mga pamilyang naniniguradong sama-sama sila sa pagsalubong sa Bagong Taon. May naghahanda ng mga bilog-bilog na prutas at nagsusuot ng may polka dots para raw yumaman. Puno ang hapag-kainan para raw masagana ang darating na taon.  Pagsampa ng alas dose, pinapatalon ang mga bata para raw tumangkad. Magpapaputok sa labas ng bahay para palayasin daw ang malas.

Sa pagpasok ng Bagong Taon, matindi ang cultural pressure na kailangan ay masaya tayo, buo ang pamilya, at puno ang bulsa. Sa pagtatapos ng taong ito at bago magsimula ang bagong taon, bakit hindi natin ituon ang selebrasyon sa Panginoon? Sabi sa Kanyang Salita, “Lumapit kayo kay Yahweh upang tulong niya’y hingin, sa tuwina’y parangalan siya at sambahin. Inyong alalahanin ang mga kamangha-mangha niyang gawa, ang matuwid na paghatol at gawang kahanga-hanga” (1 Mga Cronica 16:11-12).

Bago maging napakaingay ng paligid, bakit hindi tayo manahimik at alalahanin natin ang mga nangyari sa taong ito na nagpapatunay sa kabutihan ng Diyos? Magpasalamat tayo at sambahin natin Siya dahil sa Kanyang naging katapatan sa atin. At hingin natin ang tulong Niya para maharap natin ang lahat ng responsibilidad at hamon ng bagong taon na puno ng pag-asa.